Maletgs ed impressiuns da las visitas en ils chantuns ed en las regiuns (de)

Maletgs ed impressiuns da las visitas en ils chantuns ed en las regiuns (it)

Bun di, buongiorno, bonjour und Grüezi mitenand!

«Da chasa en Svizra ed or en il mund", uschia ha noss ambassadur a Berlin, Paul Seger, descrit ultimamain sias ragischs.

Ma tge signifitga propi questa professiun che porscha tants motivs per istorgias, anecdotas e mintgatant er per clischés?

Tge fan nossas diplomatas e noss diplomats di per di, sch'els represchentan la Svizra en il mund?

E tge enconuschientschas dovri per rinforzar la scienza e la forza innovativa da la Svizra a l'exteriur, per defender ils dretgs umans, per promover la scienza u per realisar projects da l'ambient?

Mo paucs san, tge che nossas collavuraturas e noss collavuraturs prestan mintga di da Washington sur Dakar, da la ONU a Genevra fin a Riad u Bangkok, sch'els s'engaschan sco ambassadur, sco consula u sco collavuratura e collavuratur da la DSC.

Perquai As vuless jau envidar cordialmain da scuvrir il mund da la diplomazia en Vossa vischnanca! Sin questa pagina d'internet, dentant anc meglier direct en differents chantuns ed en differentas regiuns.

Dals 19 d'avust fin ils 6 da settember è il DFAE sin viadi cun ina «Tour de Suisse» tras tut las parts da la Svizra, da l'Engiadina sur la Svizra orientala e la Svizra centrala, la Svizra bassa, il Tessin fin en la Svizra franzosa. Nossas diplomatas e noss diplomats turnan enavos en lur chantuns d'origin. Els visitan scolas, fan referats en salas communalas u baterlan cun la populaziun sin plazzas da vitgs. Els raquintan, tgi ch'els èn e tge temas che stattan actualmain en il focus da la politica exteriura. Ed anc bler auter: Els vulan savair tge accents che la politica exteriura da la Svizra duai metter.

Ad in dals indesch lieus pudais Vus emprender d'enconuscher meglier nossas collegas e noss collegas, tschentar dumondas ed als puspè trametter enavos en lur pajais ospitant cun Voss giavischs.

Il DFAE sa legra da Vossa visita: Meet the Ambassadors – quai vul dir, scuvrir las bleras fatschas da nossa diplomazia, chapir meglier la politica exteriura e gidar a la concepir.

Jau As giavisch bler plaschair d'entrar en contact cun las persunas che represchentan Voss giavischs sin tut il mund.

Pascale Baeriswyl, secretaria da stadi dal DFAE

La politica exteriura vegn en las regiuns:

Inscuntra ils / las ambassadur(a)s

Ambassaduras ed ambassadurs visitan lur chantuns d'origin en Svizra

Dals 19 d'avust fin ils 6 da settember 2019 sa renda il Departament federal d'affars exteriurs (DFAE) sin in Tour de Suisse tut spezial: En il rom dal project «Meet the Ambassadors» visitan ambassaduras ed ambassadurs svizzers durant 11 dis lur chantuns d'origin. Els raquintan là davart lur lavur a l'exteriur respectivamain tar il DFAE. En il center stat mintgamai il barat davart la politica exteriura e davart la lavur da las diplomatas e dals diplomats.